Şu gün Türkmenistanyň Döwlet medeniýet merkeziniň Mukamlar köşgünde «Ýaňlan, Diýarym – 2019» telebäsleşiginiň jemi jemlendi. Oňa onlarça zehinli aýdymçylar bilen birlikde Türkmenistanyň Ýaragly Güýçleriniň «Göreldeli» harby orkestriniň çagyryş boýunça harby gullukçysy – Ahal welaýatynyň wekili hökmünde Ýusup Ataýew hem gatnaşdy.

Maýa Kulyýewa adyndaky Türkmen milli konserwatoriýasynyň ýanyndaky Daňatar Öwezow adyndaky Türkmen döwlet ýörite sazçylyk mekdebiniň uçurymy, zehinli Watan goragçysy Ýusup Ataýew bäsleşigiň ilki etrap, soňra bolsa welaýat derejesindäki tapgyrlarynyň ýeňijisi bolýar.

Ýaş aýdymçy harby orkestr bilen bilelikde harby-medeni çärelerde yzygiderli çykyş edýär. Onuň ýerine ýetirýän aýdymlary Watanymyza bolan çyn söýgä ýugrulan. Ol aýdymlar Berkarar döwletimiziň bagtyýarlyk döwrüni dabaralandyrýar, diňe goranyş häsiýetli Harby doktrinasyna daýanýan Garaşsyz Bitarap Türkmenistanyň Ýaragly Güýçleriniň yzygiderli kämilleşdirilişini wasp edýär.

Bäsleşigiň jemleýji tapgyrynda Ý.Ataýew «Göreldeli» harby orkestr bilen bilelikde «Her ykbalda, her keremde Arkadag!» diýen aýdymy ussatlyk bilen ýerine ýetirdi. Tomaşaçylarda ýatdan çykmajak duýgulary galdyran zehinli harby gullukçynyň çykyşy joşgunly el çapyşmalar bilen garşylandy.

– Milli goşunymyzyň hatarynda gulluk edýän wagtyňda Watanymyzy wasp edýän aýdymlary aýtmagyň özem meniň üçin bahasyna ýetip bolmajak bagtdyr. Türkmenistanyň Ýaragly Güýçleriniň «Göreldeli» harby orkestriniň bir bölegi hökmünde öz ukybym bilen Milli goşunymyzyň söweşjeň ruhuny galkyndyrmak işine goşant goşmak meni aýratyn buýsandyrýar. Pursatdan peýdalanyp hormatly Belent Serkerdebaşymyzy, külli türkmen halkymyzy şanly Garaşsyzlygymyzyň XXVIII ýyllyk toýy bilen tüýs ýüregimden gutlaýaryn – diýip, Ý.Ataýew öz ýürek joşgunyny beýan etdi.

Her ýyl «Ýaňlan, Diýarym!» telebäsleşigi Watanymyzyň Garaşsyzlyk toýunyň öňýanynda Türkmenistanyň Prezidentiniň yglan eden «Türkmeniň Altyn asyry» atly döredijilik bäsleşiginiň çäklerinde geçirilýär. Bu telebäsleşik ýaşlaryň arasynda iň meşhur we abraýly döredijilik bäsleşikleriň birine öwrüldi.

Şunlukda, «Ýaňlan, Diýarym – 2019» telebäsleşiginiň jemleýji tapgyryna gatnaşyp, şowly çykyş eden Türkmenistanyň Ýaragly Güýçleriniň «Göreldeli» harby orkestriniň çagyryş boýunça harby gullukçysy Ýusup Ataýew halypa sungat ussatlarynyň ýokary bahasyna mynasyp boldy. Biz hem zehinli aýdymçymyzy tüýs ýürekden gutlap, oňa sungat äleminde mundan beýläk hem üstünlikleriň ýaran bolmagyny arzuw edýäris!

Suratlar üçin «Multimediýa».

«Milli goşun».