Watan goragçylarynyň güni mynasybetli Türkmenistanyň Goranmak ministrliginiň Berdimuhamet Annaýew adyndaky 1-nji Ýöriteleşdirilen harby mekdebinde geçirilen aýdym-sazly baýramçylyk konserti ýakymly pursatlara baý boldy.

Baýramçylyk konsertiniň dowamynda ýaňlanan hoş owazly aýdym-sazlar oňa gatnaşyjylarda örän uly täsir galdyrdy. Berkarar döwletimiziň asudalygynyň, abadançylygynyň, parahatçylygynyň, dost-doganlygyň waspyny ýetiren aýdymdyr sazlar, edebi-sazly kompozisiýalar harby gullukçylaryň ruhuny belende göterip, baýramçylyk şatlygyny artdyrdy.

Konsertiň ahyrynda harby we hukuk goraýjy edaralaryň aýdym-saz toparlarynyň ählisiniň bilelikde ýerine ýetiren jemleýji aýdymy merdana Watan goragçylarynyň ýürek owazy, Berkarar döwletiň täze eýýamynyň Galkynyşy döwrüni peşgeş beren Gahryman Arkadagymyza, hormatly Belent Serkerdebaşymyza egsilmez alkyşnama bolup ýaňlandy.