Ýurdumyzyň tebigy baýlyklaryndan doly ýagdaýda peýdalanmak maksady bilen, Türkmenistanyň Goranmak ministrliginiň önümçilik kärhanalary öndürýän önümleriniň gerimini giňeldýär. Milli goşunymyzyň zerurlyklaryny doly üpjün etmek üçin şu günki günde Ýaragly Güýçlerimiziň şahsy düzüminiň ählisiniň diýen ýaly harby lybaslaryny bezeýän täze plastmassa önümleriniň önümçiligi hem ýola goýlandyr.

Ýerli çig malyndan öndürilen bil kemerleriniň gysdyryjylary, harby eginbaşyň talabyna laýyklykda ýyldyzjyklar we beýleki esbaplar berkliligi we has amatly düşýän öndüriliş usuly bilen tapawutlanýar. Şol sanda hojalyk işleri üçin zerur bolan dürli plastmassa gaplar, oturgyçlar, geýim asgyçlary hem ýokary hilde we yzygiderli öndürilýär.

Harby gullukçylaryň ýaşaýyş-durmuş şertlerini yzygiderli gowulandyrmagy sargyt edýän hormatly Belent Serkerdebaşymyzyň tagallalary netijesinde Ýaragly Güýçlerimiziň şahsy düzüminiň bökdençsiz gulluk etmekleri we doly dynç almaklary üçin ähli şertler döredilýär. Bu babatda Türkmenistanyň Goranmak ministrliginiň önümçilik kärhanalary Watan goragçylarynyň goş üpjünçiligini yzygiderli ýetirmekde we üpjün etmekde möhüm ähmiýete eýedir.

«Milli goşun».