Diňe goranyş häsiýetli Harby doktrinasyna daýanýan ýurdumyzda hormatly Belent Serkerdebaşymyzyň başlangyjy bilen geçirilýän harby reformanyň çäklerinde harby gullukçylaryň rahat dynç almaklary üçin iň gowy şertler döredilýär. Şu nukdaýnazardan «Awaza» milli syýahatçylyk zolagynda iki sany pudaklaýyn myhmanhana – «Watançy» we «Merdana» ýerleşýär. Däp bolşy ýaly, bu otellerde harby we hukuk goraýjy edaralarynyň işgärleri öz nobatdaky zähmet rugsatlaryny geçirýärler.

Tomusky dynç alyş möwsüminiň gyzgalaňly wagtynda bärde ruhubelentlik we şadyýanlyk höküm sürýär. Harby gullukçylar öz maşgalalary bilen bilelikde Hazar deňziniň gözel kenarynda ýerleşýän harby we hukuk goraýjy edaralaryň garamagyndaky rahat otelleriň ähli artykmaçlyklaryndan peýdalanýarlar.

Otelleriň müşderilerine doly dynç almak üçin iň gowy şertler döredilýär. Myhmanhanalar öz sagaldyş desgalaryna eýe bolup, otaglary bolsa rahat mebel we gerekli bolan enjamlar bilen üpjün edilendir. Olara degişli bolan meýdançada akwopark, howuzlar we sport desgalary gurulandyr. Bu myhmanhanalarda dynç alýanlar üçin futbol, woleýbol, basketbol ýaly sportuň dürli görnüşleri bilen meşgullanmaga mümkinçilikler bar.

– Bärde biz üçin döredilen ähli amatlyklar – ýapyk we açyk howuzlar, fitnes zaly, fitobar, sauna, türk hammamy, massaž otaglary bar. Bize ähli hyzmatlar iň ýokary derejede hödürlenýär. Bu bolsa hormatly Belent Serkerdebaşymyzyň Watan goragçylary baradaky ägirt uly aladalarynyň miwesi bolup durýar – diýip, «Merdana» otelinde maşgalasy bilen dynç alýan kapitan Merdan Saparow aýtdy.

«Milli goşun».