Türkmenistanyň Ýaragly Güýçleriniň harby gullukçylary milli goşunymyzyň söweşjeň ukybyny ýokary derejede saklamak, ony has-da kämilleşdirmek maksady bilen güýçli depginde türgenleşik işlerini yzygiderli geçirýärler. Şol sebäpli-de olaryň saglyklaryny berkitmek we çydamlylygyny artdyrmak üçin dogry we kadaly iýmitlenmek zerur bolup durýar. Munuň üçin bolsa esger naharhanalarynda möwsümleýin naharsanawy göz öňünde tutulan.

Mysal üçin, tomus paslynda esgerlere gawun-garpyz ýaly azyk önümleri hödürlenilýär. Bu bolsa adamyň bedenine gerek bolan witaminleriň we mikroelementleriň üstüni ýetirýär. Öz bişiş möwsüminde gawun-garpyzlar ýurdumyzyň ähli harby bölümleriniň naharhanalarynyň esger saçaklaryny bezeýär.

Gawun öz içinde wajyp mikroelementleri jemleýär. Olaryň arasynda sink we kalsiý, glýukozanyň ýokary derejesini görkezmek bolar. Gawun A, С, B we P witaminlerine hem baýdyr. Garpyz bolsa С, B, PP witaminlerini, foliý kislotasyny, kaliý we magniý mikroelementlerini özünde jemleýär.

Möwsüme görä, harby gullukçylaryň esger paýlarynyň ýany bilen dürli miweler – üzüm, alma we ş.m, gök we bakja önümleri – hyýar-pomidor we kelemli işdäaçarlar berilýär. Bulardan başga-da ýumurtga we esgerleri bütin günüň dowamynda energiýa bilen üpjün edýän başga beýleki peýdaly witaminlere baý bolan iýmitler şahsy düzümiň iýmit üpjünçiligine goýberilýär.

 «Milli goşun».