Häzirki wagtda milli bilim ulgamy dünýä ülňülerine laýyklykda ösdürilýär. Bu babatda halkara hyzmatdaşlygyna aýratyn üns berilýär. Şunuň bilen baglylykda, şu ýylyň 4 – 8-nji marty aralygynda Halkara ynsanperwer ylymlary we ösüş uniwersitetinde IV Açyk halkara matematika olimpiadasy (OMOUS – 2024) geçirildi.

Türkmenistanda ikinji gezek geçirilen bu olimpiada ýurdumyzyň ýokary okuw mekdeplerinden talyplaryň 400-e golaýy, şeýle-de Bolgariýanyň, Hytaý Halk Respublikasynyň, Russiýa Federasiýasynyň, Saud Arabystanynyň, Ispaniýanyň, Indoneziýanyň hem-de Özbegistan Respublikasynyň 25-den gowrak ýokary okuw mekdeplerinden talyp ýaşlaryň 120-ä golaýy gatnaşdylar.

Birnäçe günläp dowam eden olimpiadada türkmen talyplary 191 medal gazanmagy başardylar. Şeýle-de özbegistanly talyplar 57, russiýaly ýaşlar 26, bolgariýaly myhmanlar bolsa 8 medal gazandylar. Ispaniýadan gelen talyp 1 altyn, OMOUS dostlugy topary 1 kümüş, Hytaý Halk Respublikasyndan, Indoneziýadan we Saud Arabystanyndan gelen talyp wekiliýetleriň hersi 1 bürünç medaly eýelediler.

Ýeňiji bolan talyplara guramaçylar tarapyndan medallardyr diplomlar dabaraly ýagdaýda gowşuryldy.