Paýtagtymyzda Gazagystan Respublikasynyň Medeniýet günleri açyldy. Bu çäre köpugurly hyzmatdaşlygy mundan beýläk-de ösdürmäge, hoşniýetli goňşuçylyk we dostluk gatnaşyklaryny berkitmäge täze itergi bermäge gönükdirilendir.

Aşgabatda guralýan döredijilik çäresine gatnaşmak üçin Gazagystan Respublikasynyň Mangistau oblastynyň medeniýet işgärlerinden, artistlerinden we muzeý işgärlerinden düzülen uly wekiliýet geldi.

Aşgabatdaky döredijilik çäresiniň çäklerinde Mangistau oblastynyň taryhy-ülkäni öwreniş muzeýiniň gymmatlyklarynyň, amaly-haşam sungatynyň eserleriniň gözden geçirilişi hem-de ýurdumyzyň şekillendiriş sungaty muzeýinde fotosergi guraldy. Çäräniň açylyş dabarasynda Gazagystan Respublikasynyň Türkmenistandaky ilçisi Žandos Asanow we Mangistau oblastynyň akimi Eraly Tugžanow gatnaşdylar.

Agşamara “Watan” kinokonsert merkezinde Gazagystan Respublikasynyň Medeniýet günleriniň açylyş dabarasy boldy. Bu mynasybetli döredijilik intelligensiýanyň, giň jemgyýetçiligiň wekilleri, Türkmenistanda işleýän diplomatik wekilhanalaryň, köpçülikleýin habar beriş serişdeleriniň wekilleri, talyp ýaşlar ýygnandylar.

Gutlag sözlerinde iki ýurduň ynsanperwer gatnaşyklarynyň ýokary derejesi bellenildi. Bu gezekki döredijilik çäresiniň iki döwletiň medeniýet we ylmy düzümleriniň wekilleriniň arasyndaky göni gatnaşyklaryň mundan beýläk-de berkidilmegine ýardam berjekdigine ynam bildirildi.

Gazagystan Respublikasynyň Türkmenistandaky Medeniýet günleriniň ýapylyş dabarasy 30-njy noýabra çenli dowam eder.