Gündogaryň beýik akyldary we nusgawy şahyry Magtymguly Pyragynyň doglan gününiň 300 ýyllygy mynasybetli, «Ylym» neşirýaty tarapyndan Türkmenistanyň Ylymlar akademiýasynyň Magtymguly adyndaky Dil, edebiýat we milli golýazmalar institutynyň taýýarlan «Magtymguly – ylham çeşmesi» hem-de Taryh we arheologiýa institutynyň taýýarlan «Beýik Magtymguly we türkmen durmuşy» atly makalalar ýygyndylary çap edildi.

Bulardan başga-da, filologiýa ylymlarynyň doktory Ahmet Mämmedowyň «Magtymguly türki halklaryň edebiýatynda» atly kitaby, alym Gurbandurdy Geldiýewiň «Magtymgulynyň döredijiliginde ýer-ýurt atlary we onuň poetikasy» atly monografiýasy şanly ýylda ylmy jemgyýetçilik hem-de halk köpçüligi üçin ajaýyp sowgat boldy.