Watan goragçylarynyň gününiň öňüsyrasynda Türkmenabat şäherinde 24 maşgala täze jaýlaryň açarlaryny alyp, bu baýramy täze öýde garşylamak bagtyna eýe boldular. Olaryň ählisi Türkmenistanyň Adalat ministrliginiň Lebap welaýat bölüminiň işgärleridir.

Täze jaýlaryň açylyş dabarasyna Türkmenabat şäheriniň ýaşaýjylarydyr myhmanlary, ýaşuly nesliň wekilleri, gurluşykçylar we adalat edaralarynyň işgärleri gatnaşdylar. Döwrebap binanyň açylyş dabarasynda çykyş edenler, täze öýleriň eýeleri ýurdumyzda harby gullukçylar we hukuk goraýjy işgärler üçin edilýän taýsyz aladalar, döredilýän mümkinçilikler üçin hormatly Prezidentimiz Belent Serkerdebaşymyza tüýs ýürekden hoşallyk bildirdiler.

Ýeri gelende aýtsak, jaýyň gurluşygyny Türkmenistanyň Senagatçylar we telekeçiler birleşmesiniň agzasy bolan «Röwşen çyragy» hususy kärhanasynyň gurluşykçylary alyp bardylar. Binada otaglardaky amatlyklardan başga-da, suw, tebigy gaz, elektrik toguny geçiriş we lagym ulgamlary döwrüň ösen talaplaryna laýyklykda gurnalypdyr.