Ýurdumyzyň paýtagtynda Türkmenistanyň Garaşsyz Döwletleriň Arkalaşygynda başlyklyk etmeginiň çäklerinde geçirilýän GDA gatnaşyjy döwletleriň döredijilik we ylmy intelligensiýasynyň XIV forumy öz işini dowam edýär. Düýn, 15-nji maýda öz işine başlan forum «Arkalaşygyň umumy ynsanperwer giňişligi: medeniýet, bilim we ylym ulgamynda söhbetdeşlik» diýlip atlandyryldy. Forumyň açylyşynda duşuşyga gatnaşyjylaryň wekilçilikli düzümine Türkmenistanyň Prezidenti, GDA gatnaşyjy döwletleriň Baştutanlarynyň geňeşiniň Başlygy Gurbanguly Berdimuhamedowyň hem-de Russiýa Federasiýasynyň Prezidenti Wladimir Putiniň gutlaglarynyň okalmagy bu halkara çäräniň ähmiýetini has-da artdyrdy.

Foruma Ermenistanyň, Azerbaýjanyň, Belarusuň, Gazagystanyň, Gyrgyzystanyň, Moldowanyň, Täjigistanyň, Türkmenistanyň, Özbegistanyň, Ukrainanyň we Russiýanyň görnükli jemgyýetçilik hem-de sungat işgärleri, alymlary, medeniýet edaralarynyň, ylym we bilim merkezleriniň ýolbaşçylary, habar beriş serişdeleriniň wekillerinden 200-e golaýy gatnaşdy. Forumyň prezidiumyň agzalary diňe bir öz ýurtlarynda däl-de halkara derejesinde tanalýan şahsyýetlerdir. Olaryň hatarynda GDA-nyň Ýerine ýetiriji komitetiniň başlygy — Ýerine ýetiriji sekretary Sergeý Lebedew, Russiýa Federasiýasynyň Prezidentiniň halkara medeni hyzmatdaşlyk boýunça ýörite wekili M.Şwydkoý, GDA gatnaşyjy döwletleriň Ynsanperwer hyzmatdaşlyk boýunça döwletara gaznasynyň müdiriýetiniň başlygy Polat Bülbül ogly, YHDG-nyň Ýerine ýetiriji direktory Anatoliý Iksanow, RF-iň Prezidentiniň medeniýet meseleleri boýunça geňeşçisi Wladimir Tolstoý we beýlekiler bar.

Ynsanperwerlik ýörelgeleri bu forum GDA ýurtlarynyň arasyndaky dostlukly, ynanyşmak we däbe öwrülen gatnaşyklaryň — diňe Arkalaşygyň baýlygy bolman, eýsem, tutuş Ýewraziýanyň baýlygy bolup, dünýäniň gün tertibine täsirini ýetirýän yklymdaky durnuklylygyň hem-de howpsuzlygyň möhüm şertidigini ýene-de bir gezek dabaralandyrdy.

«Milli goşun».