Ýeňiş güni mynasybetli Aşgabatda geçirilen harby ýörişde Beýik Watançylyk urşy ýyllarynda ulanylan harby enjamlar we söweş tehnikalary baýramçylyk münberiniň öňünden geçdi. Bir wagtlar deňi-taýy bolmadyk gazaply söweş ulaglary häzirki wagtda muzeý eksponatlaryna öwrülip galdylar. Emma hut şolaryň kömegi bilen 1941 – 1945-nji ýyllarda batyrgaý gerçeklerimiz Beýik Ýeňşi gazandylar.

Ýöriş meýdançasyndan söweşijileri, ok-därileri we ýaraglary daşamak üçin ulanylan GAZ-67B, ZIS-5, URAL-ZIS kysymly awtoulaglar geçdi. Sowet artilleriýasynyň buýsanjy bolan meşhur «KATÝUŞA» hem münberiň deňinden geçdi. Ondan soň ýörişi 1942–1947-nji ýyllarda Gyzyl Goşunyň esasy ot açyjy güýji bolan T-34 tanky dowam etdirdi.

Beýik Ýeňşiň 75 ýyllygy mynasybetli geçirilen dabaraly harby ýörişde Sowet Soýuzyna ýeňiş getiren tehnikalaryň görkezilmegi dabara gatnaşan myhmanlaryň hakydasynda uruş ýyllaryny janlandyrdy.

«Milli goşun».