Beýik Ýeňşiň 75 ýyllygy mynasybetli

Türkmenistanyň Döwlet serhet gullugynyň

«Serhet abat — Döwlet abat» žurnalynyň web-saýtynda geçiriljek

«Gahrymanlar baky ýaşar gursakda»

atly döredijilik bäsleşiginiň

DÜZGÜNNAMASY

I. Bäsleşigiň maksady:

Türkmenistanyň Döwlet serhet gullugynyň «Serhet abat — Döwlet abat» žurnalynyň redaksiýasy hem-de Türkmenistanyň Magtymguly adyndaky Ýaşlar guramasynyň Merkezi Geňeşi tarapyndan yglan edilen bäsleşigiň esasy maksady, hormatly Belent Serkerdebaşymyzyň ýaşlary watançylyk ruhunda terbiýelemek baradaky asylly ýörelgesini wagyz etmekden, ýaş zehinleri ýüze çykarmakdan, olary höweslendirmekden we döredijilik üstünliklerine ruhlandyrmakdan, ýaşlarda Türkmenistanyň Döwlet serhet gullugynyň gulluk-durmuşy barada oňyn jemgyýetçilik garaýşyny döretmekden, şeýle-de 1941–1945-nji ýyllaryň Beýik Watançylyk urşunda ata-babalarymyzyň, ene-mamalarymyzyň görkezen deňsiz-taýsyz watansöýüjiligini dabaralandyrmakdan ybaratdyr.

II. Bäsleşigiň geçirilişiniň tertibi.

1. Bäsleşik 2020-nji ýylyň 10-njy apreline çenli Türkmenistanyň Döwlet serhet gullugynyň «Serhet abat — Döwlet abat» žurnalynyň redaksiýasy hem-de Türkmenistanyň Magtymguly adyndaky Ýaşlar guramasynyň Merkezi Geňeşi tarapyndan «Serhet abat — Döwlet abat» žurnalynyň web-saýtynda ýörite habar arkaly yglan edilýär.

2. Bäsleşige gatnaşyjylar öz eserlerini 2020-nji ýylyň 25-nji apreline çenli bäsleşige hödürleýärler.

3. 2020-nji ýylyň 25-26-njy apreli aralygynda emin-agzalar topary tarapyndan bäsleşigiň ýeňijileri kesgitlenilýär.

4. 2020-nji ýylyň 27-nji aprelinde «Serhet abat — Döwlet abat» žurnalynyň web-saýtynda ýeňijiler aýratyn habarda yglan edilýär.

5. 2020-nji ýylyň 29-njy aprelinde Türkmenistanyň Döwlet serhet gullugynyň Merkezi edarasynda bäsleşigiň ýeňijilerine Hormat hatlary we gymmat bahaly sowgatlary gowşurmak dabarasy geçirilýär.

III. Bäsleşigiň şertleri we düzgünleri.

1. Bäsleşige gatnaşyjylar iki sany şerti hökmany suratda berjaý etmeli:

a). Bäsleşige gatnaşmaga isleg bildirýänler öz awtorlygyna degişli bolan watançylyk, harby- gahrymançylyk we Beýik Ýeňşiň 75 ýyllygy mynasybetli parahatçylygy, asudalygy, ýurdumyzyň dost-doganlyk syýasatyny, asuda serhediniň goragyny wasp edýän mowzuklardan goşgy ýa-da gysga göwrümli proza eserlerini (oýlanma, gysgajyk hekaýalar we ş.m.) hödürlemeli.

Hödürlenjek eserler serhetabat-dovletabat@online.tm elektron salgysyna ugradylmaly (eserlere çäklendirme: her awtor 1 eser bilen gatnaşyp bilýär; goşgy – 4-5 bentden kän bolmaly däl, proza eserleri 1 sahypadan geçmeli däl (şrift – Times New Roman; kegel – 14; polýalar – standart; interwal – 1,15).

b). Sosial torlarda (imo, intagram we beýlekiler) biziň şu bäsleşigimiziň düzgünnamasyny azyndan 3 ýerde paýlaşmaly (paýlaşylandygy hakynda ssylka ýa-da skrinşot arkaly elektron poçtamyzyň üsti bilen bize habar bermeli).

1. Bäsleşge hödürlenýän eser many we grammatika tarapyndan ýalňyşsyz, şeýle-de täze, ozal hiç ýerde (metbugatda, sosial torlarda) çap edilmedik bolmaly.

Ozal bir ýerde çap edilen bolsa, ýaryşdan çykarylar (bu barada web-saýtymyzyň okyjylary ýa-da beýleki bäsleşige gatnaşyjylar poçtamyza hat ugratmak arkaly duýduryp bilerler. Şondan soň ýagdaý doly anyklanylar).

2. Eserler türkmen dilinde bolmaly we gatnaşyjylara ýaş çäklendirmesi ýok.

3. Ýaryşa hödürlenen eseriň awtorynyň doly ady we familiýasy, salgysy, telefon belgisi, bar bolsa işleýän (okaýan) ýeri anyk we takyk görkezilmeli.

4. Iki ugur boýunça (poeziýa, proza) umumylykda Baş baýrak we höweslendiriji sowgatlar göz öňüne tutulýar. Bäsleşigiň ýeňijileri ýörite düzülen emin-agzalar topary tarapyndan kesgitlener.

Bäsleşikde döreden eseri bilen Baş baýraga mynasyp bolan awtor gymmat bahaly sowgat, ýagny telewizor bilen sylaglanar hem-de oňa hormat haty gowşurylar.

Şeýle-de bäsleşikde tapawutlanan eserleriň awtorlaryna höweslendiriji sowgat hökmünde elektro suw gaýnadyjy enjamy we hormat haty gowşurylar.

5. Eseriňiz emin agzalary tarapyndan bäsleşige gatnaşmaga mynasyp görülmese, elektron poçta arkaly goşmaça duýduryljakdyr.

6. Bäsleşik üçin ugradylan eserleriň «Serhat abat — Döwlet abat» žurnalynyň redkollegiýasy tarapyndan maksadalaýyk hasap edilenleri web-saýtymyzyň «Döredijilik dünýäsi» atly bölüminde goýlar.

7. Şeýle-de, bäsleşige hödürlenen islendik eser «Serhat abat — Döwlet abat» žurnalynyň redkollegiýasy tarapyndan makul görülse, awtorlyk hukugynyň talaplary doly berjaý edilip, žurnalda çap ediler.

IV. Bäsleşigiň emin agzalary we ýeňijileri kesgitlemegiň tertibi.

Bäsleşige gatnaşyjylaryň arasynda ýeňijileri kesgitlemek üçin Türkmenistanyň Döwlet serhet gullugynyň «Serhet abat — Döwlet abat» žurnalynyň redaksiýasynyň we Türkmenistanyň Magtymguly adyndaky Ýaşlar guramasynyň Merkezi Geňeşiniň işgärlerinden, şeýle-de ýurdumyzyň belli döredijilik işgärlerinden düzülen emin agzalar topary döredilýär.

Emin agzalar bäsleşige hödürlenen işler bilen tanşyp, olara beýan edilişiň çeperçiligi we sýužediň gyzyklylygy boýunça baha bermeli we bäsleşige gatnaşyjylar tarapyndan görkezilen şertleriň ählisiniň ýerine ýetirilendigine gözegçilik etmeli.

V. Ýeňijileri sylaglamak.

Bäsleşige hödürlenjek eserler bäsleşik yglan edilen gününden başlap, 25.04.2020ý. senesine çenli kabul ediler. Ýeňiş gününiň öňüsyrasynda, 27.04.2020ý. senesinde «Serhet abat — Döwlet abat» žurnalynyň web-saýtynda ýeňijiler aýratyn habarda yglan ediler. 29.04.2020ý. senede resmi ýagdaýda baýrak gowşurylyş dabarasy guralyp, bäsleşigiň ýeňijilerine Türkmenistanyň Döwlet serhet gullugynyň «Serhet abat — Döwlet abat» žurnalynyň redaksiýasy hem-de Türkmenistanyň Magtymguly adyndaky Ýaşlar guramasynyň Merkezi Geňeşi tarapyndan Hormat hatlary we gymmat bahaly sowgatlar gowşurylýar.

Biziň web salgymyz: www.serhetabat-dovletabat.gov.tm;

E-poçtamyz: serhetabat-dovletabat@online.tm;

Habarlaşmak üçin telefonlar: 39-53-45, 39-53-65, 39-53-51, 39-51-18, 39-56-20.