4-nji martda geçirilen sanly wideoaragatnaşyk arkaly iş maslahatynda Döwlet Baştutanymyz Gurbanguly Berdimuhamedow wise-premýer P.Agamyradowa 2020-nji ýylda Ýaponiýanyň paýtagty Tokio şäherinde geçiriljek XXXII tomusky Olimpiýa oýunlaryna gatnaşjak ýygyndy toparlary taýýarlamak işine uly jogapkärçilik bilen çemeleşmelidigini tabşyrdy.

Milli Liderimiz «2020-nji ýylda Ýaponiýanyň Tokio şäherinde geçiriljek XXXII Tomusky Olimpiýa oýunlaryna Türkmenistanyň ýygyndy toparlarynyň gatnaşmagy hakynda» Karara gol çekdi. Resminama laýyklykda, Aşgabat şäherindäki Olimpiýa şäherjiginde uzakmöhletleýin we «Awaza» sport toplumynda möwsümleýin sportuň görnüşleri boýunça Türkmenistanyň ýygyndy toparlarynyň okuw-türgenleşik ýygnanşyklaryny geçirmek üçin ýöriteleşdirilen sport bazalary dörediler.

Olimpiýa şäherjiginiň binýadynda türgenler ýaşaýyş jaýlary we ýörite iýmitler bilen üpjün ediler, olaryň hiline we howpsuzlygyna hünärmenler gözegçilik eder. Galyberse-de, bu ýerde türgenlere degişli lukmançylyk hyzmatlaryny etmek ýola goýlar.