Ýakyn günlerde futbol boýunça Aziýanyň kubogyny almak ugrundaky ýaryşlar badalga berler. Abraýly baýrak ugrundaky ýaryşyň final tapgyrynda Türkmenistanyň milli ýygyndysy «F» toparçada çykyş eder.

Aziýanyň kubogy ugrundaky ýaryşyň öňüsyrasynda ýurdumyzyň milli ýygyndy topary türgenleşik taýýarlygyny ýokary derejede geçirdi. Taýýarlygyň çäklerinde birnäçe ýoldaşlyk duşuşyklary geçirildi. Aziýanyň kubogy ugrundaky ýaryş Birleşen Arap Emirliklerinde geçiriler. Oýunlara 5-nji ýanwarda badalga berlip, 1-nji fewrala çenli dowam eder. Türkmen futbolçylarynyň garşydaşlary Ýaponiýanyň, Özbegistanyň, Omanyň topary bolar. Biziň futbolçylarymyz ilkinji duşuşygyny 9-njy ýanwarda ýaponiýaly garşydaşlary bilen geçirer. Milli ýygyndymyz 13-nji ýanwarda Özbegistanyň, 17-nji ýanwarda Omanyň topary bilen duşuşar.

Taýýarlyk türgenleşik okuwlary netijesinde milli ýygyndymyzyň düzümi tassyklanyldy. Ýurdumyzyň çempiony Aragatnaşyk ministrliginiň «Altyn asyryndan» 11, «Ahaldan» 7, nebiti gaýtadan işleýän zawodlar toplumynyň «Şagadam» toparyndan 1 oýunçy milli ýygyndymyza çagyryldy. Olaryň hataryna Çehiýada, Özbegistanda, Gyrgyzystanda, Indoneziýada oýnaýan futbolçylarymyz hem goşular.