Düýn – 25-nji maýda Aşgabat şäheriniň güni mynasybetli paýtagtymyzyň Bagtyýarlyk etrabynyň «Çoganly» ýaşaýyş toplumynda iki gatly 136 sany ýaşaýyş jaýynyň açylyp ulanmaga berilmegi mynasybetli dabara geçirildi.

Şanly seneleriň bellenilýän günlerinde ýurdumyzda täze ýaşaýyş jaýlaryny ulanmaga bermek asylly däbe öwrüldi. Türkmen edebiýatynyň meşhur wekiliniň doglan gününiň 300 ýyllygynyň bellenilýän «Pähim-paýhas ummany Magtymguly Pyragy» ýylynda-da bu asylly däp mynasyp dowam etdirilýär. Dabara gatnaşyjylar çykyşlarynda «Çoganly» ýaşaýyş toplumynda täze jaýlaryň açylmagy mynasybetli şu günki dabaranyň geçirilmeginiň Gahryman Arkadagymyzyň başyny başlan asylly işleriniň Arkadagly Gahryman Serdarymyzyň baştutanlygynda üstünlikli durmuşa geçirilýändiginiň aýdyň mysalydygyny bellediler.

Täze jaýlaryň öňündäki meýdançada medeniýet we sungat ussatlarynyň baýramçylyk çykyşlary ýaýbaňlandyryldy. Jaýlaryň golaýynda ak öýler dikilip, dürli sahna çykyşlary guraldy. Bu görnüşler dabara aýratyn öwüşgin çaýdy.

«Çoganly» ýaşaýyş toplumynyň çäginde gurlan jaýlaryň otaglarynda, aşhanalarynda we beýleki böleklerinde ähli zerur mümkinçilikler üpjün edilipdir. Her ýaşaýyş jaýynyň öz mellek ýeri bolup, degişli düzümler, inženerçilik-tehniki ulgamlar göz öňünde tutulypdyr. Jaýlaryň ýanaşyk ýerleri göwnejaý abadanlaşdyrylyp, ýaşyl zolaklar emele getirilipdir. Bir söz bilen aýdylanda, bu ýerde rahat ýaşamak üçin hemme şertler göz öňünde tutulandyr.

Dabaranyň dowamynda has tapawutlanan gurluşykçylara döwlet Baştutanymyzyň adyndan gymmat bahaly sowgatlar gowşuryldy.