16-njy aprelda Koreýa Respublikasynyň Prezidenti Mun Çže In döwlet sapary bilen Türkmenistana geldi.

17-nji aprelde Aşgabatda hormatly Prezidentimiz Gurbanguly Berdimuhamedow bilen Koreýa Respublikasynyň Prezidenti Mun Çže Iniň arasynda gepleşikler geçiriler. Onuň dowamynda döwletara gatnaşyklarynyň möhüm ugurlary ara alnyp maslahatlaşylar.

Aziýa — Ýuwaş umman sebitiniň döwletleri bilen gatnaşyklary hemmetaraplaýyn berkitmek ýurdumyzyň daşary syýasatynyň wajyp ugurlarynyň biri bolup durýar. Onda ählumumy bähbitlere laýyk gelýän netijeli hyzmatdaşlygy ösdürmek üçin ägirt uly mümkinçilikler bar. Dünýäniň ösen ýurtlarynyň hatarynda öňdäki orny eýeleýän Koreýa Respublikasy Türkmenistany özüniň wajyp we ygtybarly hyzmatdaşy hasaplaýar.

***

16-njy aprelda «Oguzkent» myhmanhanasynyň maslahatlar zalynda Koreýa Respublikasynyň Prezidenti Mun Çže Iniň Türkmenistana döwlet saparyna gabatlanyp, iki ýurduň hökümet agzalarynyň, birnäçe ministrlikleriniň, pudaklaýyn dolandyryş edaralarynyň, ylym we bilim merkezleriniň ýolbaşçylarynyň gatnaşmagynda duşuşyk geçirildi.

Duşuşygyň dowamynda oňa gatnaşyjylar ikitaraplaýyn gatnaşyklaryň hem-de soňky ýyllarda iki ýurduň söwda-ykdysady we medeni-ynsanperwer pudaklardaky hyzmatdaşlygynyň okgunly ösüşiniň derejesini kanagatlanma bilen nygtadylar. Bellenilişi ýaly, bu gezekki ýokary derejede geçiriljek gepleşikler giň ugurlar boýunça döwletara gatnaşyklarynyň ösdürilmegine täze itergi berer.

Ýangyç-energetika toplumyndaky hyzmatdaşlygy ösdürmegiň meseleleri ara alyp maslahatlaşmalaryň özenini düzdi. Şeýle hem taraplar ägirt uly mümkinçilikleri bolan işewür gatnaşyklary köpugurly esasda ösdürmek boýunça birnäçe anyk ugurlary ara alyp maslahatlaşdylar. Şonda ylmy-tehniki we tehnologiýa babatda tejribe alşylmagyna hem aýratyn üns berildi.