10-njy aprelde hormatly Prezidentimiz Gurbanguly Berdimuhamedow Ministrler Kabinetiniň mejlisinden soňra, häzirki döwürde Türki dilli döwletleriň hyzmatdaşlyk Geňeşine başlyklyk edýän Azerbaýjan Respublikasynyň Prezidenti Ilham Aliýewiň haýyşy boýunça bu Geňeşiň wideoaragatnaşyk arkaly geçirilen maslahatyna gatnaşdy. Onuň gün tertibine Geňeşe agza döwletleriň koronawirus pandemiýasyna garşy durmakdaky tagallalaryny utgaşdyrmak bilen baglanyşykly meseleler girizildi.

Azerbaýjan Respublikasynyň Prezidenti Ilham Aliýewe şu maslahaty guramak baradaky başlangyjy öňe sürendigi üçin, tüýs ýürekden minnetdarlyk bildirip, milli Liderimiz bu maslahatyň ählumumy häsiýete eýe bolan we dünýäniň ähli döwletlerine täsir edýän örän möhüm meseleleri ara alyp maslahatlaşmak üçin oňat mümkinçilikleri döreder diýip belledi.

Ýurdumyzda ýokanç keseliň täze görnüşiniň — COVID-19 koronawirusynyň ýaýramagynyň öňüni almaga gönükdirilen toplumlaýyn çäreler öz wagtynda görüldi. Hususan-da, serhet, migrasiýa, gümrük düzgünleri tapgyrlaýyn berkidildi. Şol bir wagtyň özünde emele gelen hakyky ýagdaýlar sebäpli, Türkmenistanyň daşary ýurtlar bilen howa gatnawlary çäklendirildi diýip, milli Liderimiz sözüni dowam etdi.

Öz wagtynda görlen bu çäreleriň netijesinde, Türkmenistanda arassaçylyk- epidemiologik ýagdaýlar durnukly bolmagynda galýar we gözegçilikde berk saklanýar diýip, hormatly Prezidentimiz Gurbanguly Berdimuhamedow belledi hem-de bu ugurda zerur bolan ähli işleriň dowam etdiriljekdigini aýtdy. Biziň ileri tutýan esasy wezipämiz adamlaryň howpsuzlygyny, durmuşyny we saglygyny üpjün etmekdir. Döwletimiz munuň üçin ähli tagallalary eder.