16-njy maýda ýurdumyzyň Söwda-senagat edarasynda ýurdumyzyň oba hojalygynyň gazananlarynyň sergisi hem-de «Türkmenistanyň oba hojalyk ekinleriniň tohumçylyk ulgamynda ýetilen sepgitler we öňde durýan möhüm wezipeler» atly halkara ylmy maslahat geçirildi.

Serginiň açylyş dabarasyna dürli ministrlikleriň we pudaklaýyn edaralaryň wekilleri, daşary ýurtlaryň Türkmenistanda işleýän diplomatik wekilhanalarynyň ýolbaşçylary, ýurdumyzyň jemgyýetçilik guramalarynyň, köpçülikleýin habar beriş serişdeleriniň, şeýle hem Türkmenistanyň we daşary ýurtlaryň işewür toparlarynyň wekilleri gatnaşdylar. Şu günler ýurdumyzda geçirilýän GDA gatnaşyjy döwletleriň döredijilik we ylmy intelligensiýasynyň XIV forumynyň wekilleri serginiň esasy myhmanlary boldular.

Günüň ikinji ýarymynda Söwda-senagat edarasynda geçirilen «Türkmenistanyň oba hojalyk ekinleriniň tohumçylyk ulgamynda ýetilen sepgitler we öňde durýan möhüm wezipeler» atly şu günki halkara ylmy maslahatyň gün tertibine GDA ýurtlarynda tohumçylygy dolandyrmak boýunça maglumat-seljerme ulgamynyň döredilmegine bagyşlanan meseleler girizildi. Onda tohumçylyk ulgamynda we hyzmatdaşlygy mundan beýläk-de ösdürmekde milli işläp taýýarlamalar görkezildi.