Düýn – 22-nji iýunda Arkadag şäherinde geçirilýän Medeniýet hepdeligi dabaraly açyldy. Hormatly Prezidentimiz Serdar Berdimuhamedowyň iberen Gutlagynda bellenilişi ýaly: «Gündogaryň beýik akyldary we nusgawy şahyry Magtymguly Pyragynyň doglan gününiň 300 ýyllygynyň giňden bellenilýän ýylynda bu giň gerimli medeni forumyň «akylly» şäher konsepsiýasyna laýyklykda gurlan Arkadag şäherinde ilkinji gezek geçirilmegi aýratyn many-mazmuna eýedir».

Medeniýet hepdeliginiň dowamynda «Muzeý gymmatlyklaryny hasaba almak we gorap saklamak boýunça dünýä tejribesiniň mümkinçilikleri» atly iş maslahaty hem-de muzeý gymmatlyklarynyň we amaly-haşam sungatynyň eserleriniň sergisi, «Älem nury» atly sahna eseriniň ilkinji görkezilişi, «Magtymguly» operasynyň görkezilişi, kino sungatyna bagyşlanan döredijilik duşuşygy we «Kompozitor» atly filmiň görkezilişi, çagalar döredijilik toparlarynyň «Arkadagyň bagtyýar nesilleri» atly aýdym-sazly çykyşlary, şahyrlaryň «Arkadag şäheri – bagtyň şäheri» atly şygryýet agşamy, ýurdumyzyň medeniýet we sungat ussatlarynyň konserti, žurnalistleriň we beýleki döredijilik işgärleriniň dabaraly maslahaty, foruma gatnaşyjylaryň Türkmenistanyň Dokma senagaty ministrliginiň «Dokmaçylar» medeni merkeziniň açylyş dabarasy, «Görogly» atly teatrlaşdyrylan sirk tomaşasynyň ilkinji görkezilişi, ýaşlaryň arasynda yglan edilen «Pähim-paýhas ummany Magtymguly Pyragy» atly bäsleşigiň ýeňijilerini sylaglamak dabarasy, Medeniýet we sungat işgärleriniň hem-de Magtymguly Pyragynyň şygryýet güni mynasybetli baýramçylyk konsertidir döredijilik agşamy, Arkadag şäheriniň açylmagynyň 1 ýyllygy mynasybetli aýdym-sazly baýramçylyk dabaralary guralar.